हिंदुस्तान 24 न्यूज

राज्याचे अर्थसंकल्पीय अधिवेशन 23 फेब्रुवारी पासून सुरू, अर्थसंकल्प 6 मार्च रोजी सादर होणार

विधानपरिषदेचे सभापती प्रा. राम शिंदे व विधानसभा अध्यक्ष ॲड. राहुल नार्वेकर यांच्या अध्यक्षतेखाली आणि मुख्यमंत्री देवेंद्र फडणवीस यांच्या प्रमुख उपस्थितीत विधानपरिषद व विधानसभा कामकाज सल्लागार समितीची बैठक पार पडली.

राज्य विधिमंडळाच्या मुंबईत होणाऱ्या अर्थसंकल्पीय अधिवेशनाचे कामकाज सोमवार, 23 फेब्रुवारी ते बुधवार, 25 मार्च 2026 पर्यंत निश्चित करण्यात आले आहे. तसेच 6 मार्च रोजी अर्थसंकल्प मांडण्याचा निर्णय घेण्यात आला आहे. यासह, राज्याचे माजी उपमुख्यमंत्री स्व. अजित पवार यांना मंत्रिमंडळ बैठक, विधानपरिषद आणि विधानसभेच्या कामकाज सल्लागार समितीच्या बैठकीदरम्यान श्रद्धांजली अर्पण करण्यात आली. तसेच, अधिवेशनाच्या पहिल्या दिवशी दोन्ही सभागृहांमध्ये शोक प्रस्ताव मांडण्याचा निर्णय घेण्यात आला.

अधिवेशन काळात शनिवार, 28 फेब्रुवारी रोजी शासकीय सुट्टीच्या दिवशी विधिमंडळाचे कामकाज होणार आहे आणि सोमवार, 2 मार्च रोजी होळी आणि 3 मार्च रोजी धूलिवंदन असल्याने कामकाज होणार नाही. 19 मार्चला गुढीपाडव्याची सार्वजनिक सुट्टी असल्याने या दिवशी कामकाज होणार नाही. तसेच 20 मार्च रोजी देखील विधिमंडळ कामकाज होणार नाही.

अधिवेशनामध्ये येणारे महत्त्वाचे विषय!

● संयुक्त राष्ट्र संघाने सन 2026 हे ‘आंतरराष्ट्रीय महिला शेतकरी वर्ष’ म्हणून घोषित केले आहे. यावर चर्चा केली जाणार.

● जागतिक महिला दिनानिमित्त दिनांक 9 मार्च रोजी दोन्ही सभागृहात चर्चा होणार.

● मराठी भाषा गौरव दिननिमित्त चर्चा होणार.

● सभागृहातून निवृत्त होणाऱ्या सदस्यांचा निरोप समारंभ होणार.

यावेळी उपमुख्यमंत्री एकनाथ शिंदे, उपमुख्यमंत्री सुनेत्रा पवार, विधानपरिषदेच्या उपसभापती डॉ. नीलम गोऱ्हे, विधानसभा उपाध्यक्ष अण्णा बनसोडे, मंत्री चंद्रशेखर बावनकुळे, मंत्री चंद्रकांत पाटील, मंत्री छगन भुजबळ व इतर मान्यवर उपस्थित होते.

उजनी  धरणग्रस्त  बचाव संघर्ष समिती यांचेकडून शेतकरी मच्छीमार बांधवांसाठी बैठकीचे आयोजन करण्यात आलेले आहे या बैठकीमध्ये खालील मुद्द्यांवर शिक्कामोर्तब करण्यासाठी सर्व धरणग्रस्त व मच्छीमार बांधव यांना उपस्थित राहण्याचे आवाहन उजनी धरणग्रस्त बचाव संघर्ष समितीतर्फे करण्यात आले आहे

यामध्ये प्रामुख्याने 1)शासन निर्णय 17 जून 2019 व शासन निर्णय 8 ऑक्टोबर 2025 रद्द झाला पाहिजे 2) शेतकरी उजनी संपादित जमीन पूर्वपरंपरा गत वहिवाट करीत असून त्यावर आपली उपजीविका करत आहे ती जमीन वाचली पाहिजे 3) उजनी धरणातील जलसाठ्यामुळे मच्छिमार करणारे लोक मच्छीमारी करून आपली उपजीविका करीत आहेत त्यांचा हक्क अबाधित राहिला पाहिजे 4) संपादित जमिनी शेतकऱ्यांकडून काढून घेऊन ती खाजगी कंपन्यांना किंवा उद्योगपतींना देण्यास शेतकऱ्यांचा तीव्र विरोध आहे 5) महाराष्ट्र शासनाने धरणासाठी  संपादित केलेली परंतु अध्यापन वापरलेली जमीन मूळ शेतकऱ्यांना परत किंवा करारावर द्यावी अशी आणि विविध मागण्यांसाठी बुधवार दिनांक 11 फेब्रुवारी 2026 रोजी सायंकाळी सात वाजता कांदलगाव तालुका इंदापूर जिल्हा पुणे या ठिकाणी बैठकीचे आयोजन करण्यात आले आहे तरी संघर्ष समितीच्या वतीने सर्व शेतकरी बांधव मच्छीमार बांधव यांना उपस्थित राहण्याचे नम्र विनंती

बावडा दि.7. वंदे मातरम ही एक भावना आहे. की ज्यामुळे शौर्य बलिदान आणि त्याग डोळ्यासमोर उभे राहतात. असे प्रतिपादन एडवोकेट बलराज स्वामी कैरमकोंडा यांनी केले. बावडा (ता. इंदापूर) येथील श्रीमती रत्नप्रभादेवी पाटील महाविद्यालयामध्ये गुरूवार (दि. 5) रोजी सावित्रीबाई फुले पुणे विद्यापीठ राष्ट्रीय सेवा योजना विभाग यांच्या वतीने आयोजित कार्यक्रमात प्रमुख वक्ते म्हणून ते बोलत होते. कार्यक्रमाचे प्रास्ताविक राष्ट्रीय सेवा योजना कार्यक्रम अधिकारी प्रा. सिद्धार्थ चितारे यांनी केले. कार्यक्रमाचे अध्यक्ष म्हणून महाविद्यालयाचे आयक्युएसी प्रमुख डॉ. तायाजी लोंढे होते. प्रत्येक गोष्टीला काही कार्यकारण भाव असतो. वंदे मातरम् पाठीमागे असाच राष्ट्रभक्तीचा भाव होता. इंगजांनी वंदे मातरम् वरती बंदी घातली त्यामुळे देशप्रेम उफाळून आले. आजही अशी देशप्रेमाची भावना तरूणांच्या मनात असली पाहिजे. असे प्रतिपादन त्यांनी आपल्या भाषणात केले. महाविद्यालयाचे प्राचार्य डॉक्टर लहू वावरे सर यांनी या कार्यक्रमासाठी शुभेच्छा दिल्या. याप्रसंगी महाविद्यालयाचे सर्व प्राध्यापक आणि प्राध्यापिका उपस्थित होते. सूत्रसंचालन इम्रान शेख आणि प्रियांका खंडागळे यांनी केले, तर प्रा. सौ. अर्चना हरीहर यांनी आभार मानले. संस्थेचे अध्यक्ष माननीय हर्षवर्धन पाटील आणि संचालक मंडळ यांनी या उपक्रमाचे कौतुक केले.

मतमोजणी प्रक्रियेसाठी जिल्हा प्रशासन सज्ज-जिल्हाधिकारी जितेंद्र डुडी

पुणे, दि.८: राज्य निवडणूक आयोगाच्या आदेशानुसार पुणे जिल्ह्यात जिल्हापरिषदा व पंचायतीसमितीकरिता ७ फेब्रुवारी २०२६ रोजी मतदानप्रक्रिया पार पडली; या निवडणुकीकरिता ९ फेब्रुवारी रोजी सकाळी १० वाजता मतमोजणी सुरु होणार आहे, याकरीता जिल्हा प्रशासन सज्ज आहे, अशी माहिती जिल्हाधिकारी तथा जिल्हा निवडणूक अधिकारी जितेंद्र डुडी यांनी दिली आहे.

या मतमोजणीच्या कामकाजाकरिता पुरेशा अधिकारी-कर्मचाऱ्यांची नेमणूक करण्यात आली आहे. निकालाच्यादिवशी कायदा व सुव्यवस्था बिघडू नये याकरिता पर्याप्त व पुरेसा पोलीस बंदोबस्त तैनात करण्यात असून त्याअनुषंगाने प्रतिबंधात्मक आदेश निर्गमित करण्यात आले आहेत.

प्रत्येक निवडणूक निर्णय अधिकारी यांनी त्यांच्या स्तरावरून मतमोजणी कर्मचाऱ्यांची नेमणूक करून त्यांना आवश्यक प्रशिक्षण देण्यात आलेले आहे. मतमोजणीच्या अनुषंगाने प्रत्येक मतमोजणी केंद्रावर आवश्यक साहित्य उपलब्ध व व्यवस्था करण्यात आल्या आहेत. मतमोजणी केंद्रात प्रवेशाकरिता संबंधित कर्मचारी, उमेदवार व त्यांचे प्रतिनिधी तसेच माध्यमांच्या प्रतिनिधींना प्रवेशिकाही देण्यात आलेल्या आहेत. माध्यमांच्या प्रतिनिधींना फेरीनिहाय निकाल तातडीने उपलब्ध करून देण्याकरिता मतमोजणी केंद्रावर स्वतंत्र बैठक व्यवस्था (माध्यम कक्ष) तयार करण्यात आले आहेत.

संपूर्ण मतमोजणी प्रक्रियेचा आढावा घेऊन अचूक व सुयोग्य पद्धतीने मतमोजणी प्रक्रिया पार पाडण्याकरिता काटेकोर नियोजन व रंगीत तालीम घेण्याबाबत सर्व निवडणूक निर्णय अधिकारी यांना सूचना निर्गमित केल्या आहेत. त्याचबरोबर सुरक्षा व्यवस्थेचा आढावाही घेण्यात आला आहे, अशी माहिती जिल्हाधिकारी श्री. डुडी यांनी दिली आहे.

बारामती विधानसभा पोटनिवडणुकीच्या पार्श्वभूमीवर विशेष मतदारयादी पुनरिक्षण कार्यक्रम जाहीर

संपादकीय

पुणे , दि ८ : पुणे जिल्ह्यातील २०१–बारामती विधानसभा मतदारसंघातील रिक्त जागा भरण्यासाठी लवकरच विधानसभेची पोटनिवडणूक होण्याची शक्यता आहे. त्या पार्श्वभूमीवर भारत निवडणूक आयोगाने लोकप्रतिनिधित्व अधिनियम, १९५० मधील कलम २१ अन्वये २०१–बारामती विधानसभा मतदारसंघासाठी विशेष संक्षिप्त मतदारयादी पुनरिक्षण कार्यक्रम जाहीर केला आहे.

हा कार्यक्रम १ जानेवारी २०२६ या अर्हता दिनांकावर आधारित असेल. निवडणूक आयोगाच्या सूचनांनुसार मतदारयादी अद्ययावत, अचूक आणि पारदर्शक राहावी यासाठी हा कार्यक्रम राबविण्यात येणार आहे. त्यानुसार एकत्रित प्रारूप मतदारयादी सोमवार, ९ फेब्रुवारी २०२६ रोजी प्रसिद्ध करण्यात येईल. त्यानंतर ९ फेब्रुवारी २०२६ ते २५ फेब्रुवारी २०२६ या कालावधीत मतदारांकडून दावे व हरकती स्वीकारल्या जाणार आहेत. *तरी मतदारांनी त्यांचे नाव प्रारूप मतदार यादीमध्ये आहे की नाही, याची तपासणी करावी. नाव नसल्यास फॉर्म क्रमांक ६ भरून मतदार यादीत नाव नोंदवावे. तसेच नावामध्ये किंवा मतदार यादीतील तपशिलामध्ये दुरुस्ती आवश्यक असल्यास फॉर्म क्रमांक ८ भरावा, असे आवाहन जिल्हाधिकारी तथा जिल्हा निवडणूक अधिकारी जितेंद्र डुडी यांनी केले आहे.*

प्राप्त दावे व हरकतींची छाननी करून त्या ६ मार्च २०२६ पर्यंत निकाली काढण्यात येणार असून, अंतिम मतदारयादी मंगळवार, १० मार्च २०२६ रोजी प्रसिद्ध केली जाणार आहे.

या प्रक्रियेच्या प्रभावी अंमलबजावणीसाठी तसेच मतदान केंद्रांची यादी तयार करताना स्थानिक स्तरावर सुसूत्रता राखण्यासाठी पुणे जिल्हाधिकारी व जिल्हा निवडणूक अधिकारी तसेच बारामती मतदार नोंदणी अधिकारी यांच्या स्तरावर मान्यता प्राप्त राजकीय पक्षांबरोबर बैठकांचे आयोजन करण्यात येणार आहे. या बैठकीत राजकीय पक्षांना कार्यक्रमाची सविस्तर माहिती देण्यात येऊन आवश्यक सूचना व सूचना-आदानप्रदान करण्यात येणार असल्याचे मुख्य निवडणूक अधिकारी कार्यालयाकडून कळविण्यात आले आहे.