चेतना कॉलेज ऑफ फार्मसीच्या शिक्षक मेळाव्यात शिक्षण व करिअर संधींचा आढावा
संपादकीय
दि. २५ जानेवारी २०२६ :
येथील चेतना कॉलेज ऑफ फार्मसी येथे आयोजित शिक्षक मेळावा उत्साहपूर्ण वातावरणात संपन्न झाला. या कार्यक्रमाची प्रस्तावना प्रा. चिंतामणी रणवरे सर यांनी केली. आपल्या मनोगतात त्यांनी शिक्षकांचे समाजातील योगदान व विद्यार्थ्यांच्या सर्वांगीण विकासात शिक्षकांची भूमिका महत्त्वाची असल्याचे नमूद करत गुणवत्तापूर्ण शिक्षणाची आवश्यकता अधोरेखित केली.
कार्यक्रमाचे सूत्रसंचालन प्रा. प्राजक्ता झगडे यांनी अत्यंत प्रभावी व नेटकेपणाने केले. त्यांच्या आत्मविश्वासपूर्ण व समतोल सादरीकरणामुळे संपूर्ण कार्यक्रमात शिस्तबद्ध व सकारात्मक वातावरण निर्माण झाले.
या शिक्षक मेळाव्याचे आयोजन प्रा. अनिकेत सुर्वे, प्रा. विकास उबाळे तसेच सर्व शिक्षक व शिक्षकेत्तर कर्मचारी यांनी केले. कार्यक्रमाच्या नियोजनापासून प्रत्यक्ष अंमलबजावणीपर्यंत त्यांनी घेतलेल्या विशेष परिश्रमांमुळे हा उपक्रम यशस्वीरीत्या पार पडला.
यावेळी महाविद्यालयाचे प्राचार्य डॉ. गणेश म्हस्के सर यांनी प्रेझेंटेशनद्वारे फार्मसी क्षेत्रातील विविध करिअर संधींबाबत सविस्तर मार्गदर्शन केले. तसेच व्यावसायिक कोर्स करताना मुलांना कोणकोणत्या सरकारी व खाजगी शिष्वृती उपलब्ध आहेत याची माहिती दिली. फार्मसी शिक्षण, संशोधन, औषध उद्योग, क्लिनिकल रिसर्च, मेडिकल डिव्हाइस, रेग्युलेटरी अफेअर्स तसेच शासकीय व खासगी क्षेत्रातील संधी त्यांनी उदाहरणांसह स्पष्ट केल्या. बदलत्या काळानुसार विद्यार्थ्यांनी आधुनिक कौशल्ये आत्मसात करून स्पर्धात्मक परीक्षांसाठी सज्ज राहावे, असे आवाहन त्यांनी केले.
या मेळाव्यात उपस्थित शिक्षकांनी आपले अनुभव, विचार व सूचना एकमेकांशी शेअर केल्या. अशा प्रकारच्या मेळाव्यांमुळे शिक्षकांमधील सहकार्य, स्नेह आणि व्यावसायिक विकासाला चालना मिळते, असे मत यावेळी व्यक्त करण्यात आले.
कार्यक्रमाच्या शेवटी स्नेहभोजन व आपुलकीच्या संवादातून मेळाव्याचा समारोप झाला. या मेळाव्यामुळे शिक्षकांमधील स्नेहबंध अधिक दृढ होऊन आगामी शैक्षणिक उपक्रमांसाठी सकारात्मक ऊर्जा निर्माण झाली.या उपक्रमामुळे विद्यार्थ्यांना त्यांच्या भविष्याच्या नियोजनात मदत होईल, अशी अपेक्षा व्यक्त करण्यात आली आहे.
या कार्यक्रमात चेतना फाउंडेशन चे अध्यक्ष उदय देशपांडे, सचिव विलास भोसले, खजिनदार सोमनाथ माने, सदस्य बाळासाहेब बोराटे उपस्थित होते.