माहिती अधिकारी राजेंद्र सरग यांना अखिल भारतीय मराठी पत्रकार संघाच्या वतीने श्रद्धांजली अर्पण.

पुणे जिल्हा माहिती अधिकारी, प्रसिद्ध व्यंग चित्रकार राजेंद्र सरग यांना अखिल भारतीय मराठी पत्रकार परिषद संलग्न पुणे जिल्हा व इंदापूर तालुका मराठी पत्रकार संघाच्यावतीने श्रद्धांजली अर्पण करण्यात आली. पत्रकार संघाचे जेष्ठ मार्गदर्शक अतुल तेरखेडकर, डॉ. विकास शहा यांच्या मार्गदर्शनाखाली हा कार्यक्रम झाला.

यावेळी पत्रकार संघाचे जिल्हाध्यक्ष डॉ.संदेश शहा म्हणाले, माहिती अधिकारी राजेंद्र सरग यांच्या जाण्याने पत्रकारांचा जवळचा मित्र हरपला आहे. इंदापूर पत्रकार संघाच्यावतीने पत्रकार दिनानिमित्त येथील शहा सांस्कृतिक भवनमध्ये सहकारमंत्री हर्षवर्धन पाटील, राष्ट्रीय अध्यक्ष एम. डी. शेख तसेच जिल्हा माहिती अधिकारी राजेंद्र सरग यांच्या प्रमुख उपस्थितीत कार्यक्रम ठेवण्यात आला होता.

श्री. सरग यांना पुण्याहून निघण्यास उशीर झाल्याने कार्यक्रम सुरु झाला. यावेळी जेष्ठ पत्रकार व बारामती येथील पत्रकार यांचा सत्कार झाला. यावेळी आधुनिक पत्रकारिता यावर कार्यशाळा संपन्न झाली. कार्यक्रमास २०० हून जास्त पत्रकार उपस्थित होते. कार्यक्रम संपला असे जाहीर करण्यापूर्वी एक व्यक्तिमत्त्व पुढे व्यासपीठावर आले. ते म्हणाले मी संपूर्ण कार्यशाळेस पत्रकार म्हणून हजर होतो, मला ही कार्यशाळा फार आवडली. कार्यशाळेचा हा इंदापूर पॅटर्न मी शासनास जरुर कळवेल तसेच जिल्ह्यात सर्वांना सांगेल. मूर्ती लहान पण कीर्ती महान असलेले हे सव्यसाची व्यक्तिमत्व म्हणजे राजेंद्र सरग साहेब होय.

यावेळी पत्रकार संघाचे पुणे जिल्हा निरीक्षक शौकत तांबोळी, जिल्हा संपर्कप्रमुख काकासाहेब मांढरे, तालुकाध्यक्ष राजेंद्र कवडे-देशमुख, उपाध्यक्ष संतोष ननवरे, सचिव धनंजय कळमकर, शहराध्यक्ष सुरेश जकाते, खजिनदार अंगद तावरे, शैलेश काटे, संघटक दीपक खिलारे, रामवर्मा आसबे यांच्यासह पत्रकार सदस्य यावेळी उपस्थित होते.

===================================