पुणे–राजस्थान रेल्वे सेवांच्या विस्तारासाठी रेल्वेमंत्र्यांना सविस्तर निवेदन

पुणे, महाराष्ट्र : जन आंदोलन ग्रुप (पुणे) यांच्या वतीने पुणे व राजस्थान दरम्यान अधिक सक्षम व सोयीस्कर रेल्वे संपर्क उपलब्ध करून देण्याच्या मागणीसाठी केंद्रीय रेल्वेमंत्री मा. श्री. अश्विनी वैष्णव यांना सविस्तर निवेदन पाठविण्यात आले आहे. या निवेदनाच्या प्रती पुणे, जोधपूर, जालोर-सिरोही, पाली तसेच बाडमेर-जैसलमेर येथील माननीय खासदार आणि रेल्वे विभागातील वरिष्ठ अधिकाऱ्यांनाही पाठविण्यात आल्या आहेत.

जन आंदोलन ग्रुपचे संयोजक डी. आर. कुमावत यांनी सांगितले की, पुणे व परिसरात राजस्थानमधून स्थलांतरित झालेले लाखो नागरिक वास्तव्यास असून रोजगार, व्यवसाय, शिक्षण, धार्मिक यात्रा तसेच कौटुंबिक कारणांसाठी त्यांचा राजस्थानकडे सतत प्रवास सुरू असतो. मात्र, सध्या उपलब्ध असलेल्या मर्यादित रेल्वे सेवांमुळे प्रवाशांना मोठ्या प्रतीक्षा यादीचा सामना करावा लागत असून तिकीट उपलब्धतेची गंभीर समस्या निर्माण झाली आहे.

निवेदनामध्ये पुढील प्रमुख मागण्या करण्यात आल्या आहेत :

• बाबा रामदेवरा यात्रेदरम्यान पुणे–रामदेवरा/जैसलमेर विशेष रेल्वे सेवा सुरू करण्यात यावी.

• श्रावण व भाद्रपद महिन्यांत अतिरिक्त विशेष गाड्यांचे संचालन करण्यात यावे.

• पुणे–भिलडी–जालोर–जोधपूर या मार्गावर नवीन थेट नियमित रेल्वे सेवा सुरू करण्यात यावी.

• आठवड्यातून २ ते ३ फेऱ्या अथवा दैनंदिन रेल्वे सेवा उपलब्ध करून देण्यात यावी.

• पुणे–फालना–मारवाड जंक्शन–जोधपूर–रामदेवरा–जैसलमेर मार्गावर अमृत भारत अथवा वंदे भारत स्लीपरसारख्या आधुनिक रेल्वे सेवांच्या संचालनाचा विचार करण्यात यावा.

कुमावत यांनी नमूद केले की, ही मागणी केवळ राजस्थानमधील नागरिकांपुरती मर्यादित नसून लाखो भाविक, विद्यार्थी, व्यापारी, पर्यटक तसेच स्थलांतरित कामगार यांच्या हिताशी निगडित आहे. जनभावना लक्षात घेऊन रेल्वे मंत्रालयाने या विषयावर सकारात्मक निर्णय घेणे आवश्यक आहे.

जन आंदोलन ग्रुपने आशा व्यक्त केली आहे की, वाढती प्रवासी संख्या व जनतेची मागणी लक्षात घेऊन रेल्वे मंत्रालय पुणे–राजस्थान मार्गावर नवीन नियमित तसेच विशेष रेल्वे सेवांना लवकरात लवकर मंजुरी देईल.

जारीकर्ता :

डी. आर. कुमावत

संयोजक, जन आंदोलन ग्रुप (पुणे)

ई-मेल : janandolangrouppune@gmail.com

पुणे, महाराष्ट्र