स्पर्धेच्या युगात करिअर कसे घडवावे? चेतना फार्मसी तर्फे मार्गदर्शनपर व्याख्यान”

संपादकीय

आज मंगळवार दि. ३० डिसेंबर २०२५ रोजी चेतना फाउंडेशन संचालित चेतना कॉलेज ऑफ फार्मसी तर्फे पळसनाथ जुनिअर कॉलेज, पळसदेव येथे करिअर मार्गदर्शनावर एक विशेष व्याख्यान आयोजित करण्यात आले.
या कार्यक्रमात चेतना कॉलेज ऑफ फार्मसीचे प्राचार्य डॉ. गणेश म्हस्के यांनी बारावी विज्ञान शाखेतील विद्यार्थ्यांना मार्गदर्शन करताना सांगितले की, आजच्या आधुनिक स्पर्धात्मक वातावरणात योग्य करिअरची निवड करणे हे विद्यार्थी तसेच पालकांसाठी अत्यंत महत्त्वाचे आणि आव्हानात्मक ठरत आहे. करिअरची दिशा ठरवताना विद्यार्थ्यांनी केवळ गुणांकडे न पाहता स्वतःची आवड, क्षमता, कौशल्ये आणि भविष्यातील संधी यांचा समतोल विचार करणे आवश्यक असल्याचे त्यांनी अधोरेखित केले.
स्पर्धा परीक्षांची शास्त्रशुद्ध तयारी, अभ्यासातील सातत्य, प्रभावी अध्ययन पद्धती, वेळेचे योग्य नियोजन तसेच यशासाठी आवश्यक असलेली मेहनत, आत्मविश्वास आणि चिकाटी यांचे महत्त्व त्यांनी उदाहरणांसह स्पष्ट केले. यासोबतच उच्च शिक्षणासाठी लागणारी शैक्षणिक कागदपत्रे वेळेवर पूर्ण ठेवण्याचे महत्त्वही त्यांनी विद्यार्थ्यांच्या लक्षात आणून दिले.
अभियांत्रिकी, वैद्यकीय, फार्मसी, व्यवस्थापन, शासकीय सेवा तसेच विविध व्यावसायिक क्षेत्रांतील संधींबाबत आपल्या २४ वर्षाच्या अनुभवाच्या आधारे त्यांनी सविस्तर माहिती दिली.
या मार्गदर्शनामुळे विद्यार्थ्यांमध्ये जागरूकता निर्माण झाली असून, आत्मविश्वास वाढला असल्याचे मत तसेच भविष्यासाठी योग्य निर्णय घेण्यास हे व्याख्यान नक्कीच उपयुक्त ठरेल, असे मत पळसनाथ महाविद्यालयाचे मुख्याध्यापक श्री.पाठक सर यांनी व्यक्त केले.
या व्याख्यानात विद्यार्थ्यांनी मोठ्या उत्साहाने भाग घेऊन प्रतिसाद दिला आणि त्यांच्या भविष्यासाठी प्रेरणा घेतली.
पळसनाथ जुनिअर कॉलेज, पळसदेव विद्यालयचे प्राचार्य श्री.पाठक सर, तसेच चेतना कॉलेज ऑफ फार्मसीचे प्रा. चिंतामणी रणवरे यांचे सहकार्य मिळाले.
या उपक्रमामुळे विद्यार्थ्यांना त्यांच्या भविष्याच्या नियोजनात मदत होईल, अशी अपेक्षा व्यक्त करण्यात आली आहे.
चेतना फाउंडेशनचे अध्यक्ष उदय देशपांडे, सचिव विलास भोसले, खजिनदार सोमनाथ माने, सदस्य बाळासाहेब बोराटे यांनी सर्वांना शुभेच्छा दिल्या.