अनुगामी लोकराज्य मह पुणे विभाग
पुणे, शासननामा न्यूज (दि २२ सप्टेंबर) राज्याचे मुख्यमंत्री देवेंद्र फडणवीस यांच्या मार्गदर्शनाखाली सुरू असलेल्या अनुलोम संस्थेच्या माध्यमातून शासकीय अधिकारी आणि अनुलोम मित्रांचा परिचय मेळावा पुण्यातील मॉडर्न कॉलेज च्या सभागृहात संपन्न झाला. पुणे विभागाच्या या कार्यक्रमास अध्यक्षस्थानी पुण्याचे विभागीय आयुक्त चंद्रकांत पुलकुंडवार, प्रमुख पाहुणे म्हणून ऑपरेशन सिन्दुर चे कमांडिंग ऑफिसर विंग कमांडर आणि राष्ट्रपती पदक विजेते देवेंद्र अवताडे उपस्थित होते.
यावेळी बोलताना विभागीय आयुक्त चंद्रकांत पुलकुंडवार यांनी “सरकारी प्रयत्नांना जनसहभागाची साथ” असे ब्रीद वाक्य असणाऱ्या अनुलोम च्या कामाबद्दल कौतुक केले. सरकारी योजना पोचवत असतानाच सामाजिक भावना जपत अनुलोम चे सर्व कार्यकर्ते निरपेक्ष भावनेने तळागाळापर्यंत पोचत आहेत. पुढील काळात स्वच्छता आणि आरोग्य या विषयावर मोठे काम उभे करण्यासाठी अनुलोम च्या सर्व अनुलोम मित्रांनी शासनाला मदत करण्याचे आवाहन आयुक्तांनी केले.
भारतीय वायू सेनेमध्ये विंग कमांडर म्हणून कार्यरत असलेले आणि राष्ट्रपती यांच्या कडून गौरव करण्यात आलेले देवेंद्र औताडे यांनी राबवलेल्या ऑपरेशन सिन्दुर च्या यशाचे गमक उपस्थितांना सांगताना सर्व अनुलोम मित्र भारावून गेले होते.
पहिल्या सत्रात मुख्यमंत्री वैद्यकीय सहाय्यता कक्ष पुणे जिल्हा प्रमुख डॉ. मानसिंग साबळे, पुणे मनपा चे मुख्य समाज विकास अधिकारी रामदास चव्हाण, पुणे जिल्ह्याचे कृषी अधीक्षक संजय काचोळे आणि जिल्हा उद्योग केंद्राचे पुणे जिल्हा व्यवस्थापक यशवंत गायकवाड या शासकीय अधिकाऱ्यांनी त्यांच्या खात्यातील सरकारी योजनांबद्दल सर्व अनुलोम मित्रांना मार्गदर्शन केले.
कार्यक्रमाचे प्रास्ताविक पुणे विभाग प्रमुख शिरीष भालेकर, सूत्रसंचालन उपविभाग जनसेवक सौरभ शिंगाडे, तसेच आभार प्रदर्शन विभाग संवादिनी सुनंदा ताई आदिक यांनी केले. यावेळी अनुलोमचे प्रांत प्रमुख स्वानंदजी ओक, चंद्रकांत पवार विजय मोरगुलवार, संध्या पुरोहित आणि पुणे जिल्ह्यातील सर्व जनसेवक उपस्थित होते.